ԲՈԼՈՐԻՆ ԴԵՄ ԵՄ

Մենք Հայաստանի Հանրապետության պատասխանատու քաղաքացիներ ենք։ Մենք մեր պետությանը տվել ենք հնարավորն ու երբեմն անհնարինը՝ անկախ իշխանություններից ու նրանց քարոզչությունից։ Արել ենք, որովհետև հավատացած ենք եղել, որ պետությունն ունի մեր կարիքը, և արել ենք, որովհետև պարտավոր էինք անել։ Սակայն անկախ մեր ներդրած ջանքերից՝ լինի դա հարկեր վճարելը, պատերազմ գնալը, թե լավ մասնագետ լինելը, մեր բոլոր իշխանությունները կանգնեցրել են մեզ կոտրած տաշտի առաջ ու հիասթափեցրել։

Նրանք շարունակ մոլորեցրել են մեզ՝ վախեցնելով արտաքին ու ներքին թշնամիներով, իրարամերժ տեղեկություններով շեղել են մեր ուշադրությունը՝ մեզ հեռացնելով իրական խնդիրների գիտակցումից։ Այս ազդեցության պատճառով իրականության մասին մեր պատկերացումը դարձել է մշուշոտ՝ մեզ մղելով անտարբերության։ Եվ չնայած մենք պատասխանատվությամբ ու նվիրումով ենք արձագանքել հանուն պետության գործելու ամեն իրավիճակի, այդուհանդերձ պետական ծրագրերի ձախողումների իրական պատասխանատուները սկսել են մեզ վրա բարդել նաև իրենց բաժին պատասխանատվությունը՝ անլուրջ արդարացումներով ու բառախաղերով խմբագրելով իրականությունը։

Չխուսափելով մեզ բաժին ընկնող պատասխանատվությունից՝ հայտարարում ենք՝ այլևս չենք պատրաստվում հանդուրժել նման իշխանությունների հերթափոխը։ Մենք չենք պատրաստվում այս մարտահրավերներով ու հնարավորություններով խառը աշխարհում ապագային պատրաստվելու գործը կրկին վստահել անպատասխանատու, անլուրջ ու ստախոս մարդկանց։

Մենք արձանագրում ենք, որ անպատասխանատվության անփոփոխ վարքագծի շուրջ այս լուռ համաձայնությունն առաջացրել է մեր պետության ու հասարակական կյանքի բնույթը որոշող մի շարք բարդ խնդիրներ։ Այս խնդիրները շուտափույթ չլուծելու դեպքում մենք ամեն օր ավելի ենք հեռանալու արժանապատիվ ապագա ունենալու հեռանկարից, մեր միջև անվստահությունն ավելի է խորանալու և այսօրվա մեր անտարբերությունը մեր սերունդների ուսերին ավելի մեծ բեռ է դնելու։

Բայց մենք հավատացած ենք, որ այդ խնդիրների լուծման դեպքում կունենանք պետություն, որտեղ խաղաղությունը կլինի պարտադրված մեր կամքով և հնարավորություններով, ինչպես նաև հարևանների հետ խաղաղ համակեցության տեսլականով։ Կձևավորվի պատասխանատվություն կրելու, ինքներս մեզ վրա հույս դնելու ներքին և արտաքին քաղաքականություն։ Մենք կփնտրենք, կգտնենք ու կհնարենք նորարարական, ասիմետրիկ ծրագրեր՝ թռիչքաձև զարգացման նախադրյալներ ստեղծելու և ապահվելու համար։ Կունենանք թափանցիկ կառավարում՝ առանց անհարկի գաղտնիության, կձևավորենք ազնիվ, բաց և հասկանալի քաղաքական միջավայր։ Կապահովենք որակ և գերազանցություն ամեն քայլում՝ ոչ միայն գործընթացներ իրականացնելու իմիտացիայի, ինչպես հատուկ է բյուրոկրատիային, այլ խնդիրներն արմատապես լուծելու համար։

Միաժամանակ, մենք գիտակցում ենք, որ մեր առջև ծառացած խնդիրները լուծելը, ինչպես նաև մեր պատկերացրած վերջնարդյունքներին հասնելը հեշտ չէ։ Այդ գործում միայն խոսքերն ու ամպագոռգոռ հայտարարությունները բավարար չեն։ Մեր նախանշած փոփոխություններին հասնելու համար պետք է քաղաքացիական բարձր գիտակցություն ու աջակցություն ամեն քաղաքացուց։ Այդ գիտակցումով ու տրամաբանությամբ մենք կկարողանանք հանձն առնել ամբողջ պետական կառավարման համակարգի վերափոխումը՝ այնտեղ սերտորեն ինտեգրելով մասնավոր ու հասարակական կառույցներին՝ նրանց իրական լծակներ և գործիքներ տալու մեթոդով։ Վերոնշյալի արդյունքում մենք կկարողանանք ի շահ պետության օգտագործել մեր երկրի լավագույն մասնագետների ներուժը, նրանց միտքն ու փորձը, ինչպես նաև ռեֆորմներ անելու նրանց քաղաքական կամքը՝ առանց նրանց իրենց լավագույն ստեղծագործական միջավայրից՝ ազատ շուկայից կտրելու։

Այսպիսով, մենք դուրս ենք գալիս այս անպատասխանատու, կեղծ ու ճահճացած համակարգի դեմ՝ հանուն հռչակած տեսիլի ու նպատակների։ Հայտարարում ենք, որ այս ճանապարհին մենք չենք համագործակցելու, չենք սատարելու ոչ մի քաղաքական ուժի, քանզի համարում ենք, որ մենք դրա կարիքը չունենք։ Եվ «հանուն միասնության» թեկուզ փոքր աջակցությունը մեզ դարձնելու է նույն համակարգի մասը, որի դեմ դուրս ենք եկել պայաքարելու։